अकोला (प्रतिनिधी प्रशिक मेश्राम): आदिवासी स्वातंत्र्य संग्रामाचे प्रेरणास्थान, लोकनायक बिरसा मुंडा यांच्या जयंतीनिमित्त 15 नोव्हेंबर रोजी संपूर्ण परिसर मूलनिवासी अस्मितेच्या जागृतीने आणि ऐतिहासिक दाव्याच्या घोषणांनी गुंजून गेला.
बिरसा मुंडा यांनी मांडलेला ‘‘अबुआ दिशोम – अबुआ राज’’ म्हणजेच आमची भूमी — आमचे राज्य, हा विचार आजही आदिवासी हक्कांच्या लढ्यात अढळ दीपस्तंभ ठरतो. वसाहतवाद, जमीनदारी आणि शोषणाच्या सर्व विरोधकांना ताठरपणे सामोरे जात बिरसांनी दिलेली प्रतिकाराची आग आजही आदिवासी समाजाला दिशा दाखवते.
सोनझारी आदिवासी समाजाचा भव्य उत्सव
सोनझारी आदिवासी समाजाने बिरसा मुंडा जयंती निमित्त पारंपरिक वेशभूषेत, ढोल-नगाऱ्यांच्या लयीत, उत्साहात,आकर्षक रोशनाई, नृत्यगायन आणि आदिवासी सांस्कृतिक वारशाचे तेजस्वी दर्शन हे या कार्यक्रमाचे विशेष वैशिष्ट्य ठरले.
वंचित बहुजन आघाडीच्या वतीने अभिवादन
या प्रसंगी वंचित बहुजन आघाडीचे अकोला महानगर प्रवक्ता रंजित वाघ उपस्थित राहून बिरसा मुंडा यांच्या पुतळ्यास माल्यार्पण केले.
त्यांनी बिरसांच्या लढ्याला, कार्याला आणि मूलनिवासी आदिवासी समाजाच्या इतिहासाला सशक्त अभिवादन करीत म्हटले की—
“जमिनीचा अधिकार, जगण्याचा अधिकार आणि ओळखीचा अधिकार हा आदिवासी समाजाचा जन्मसिद्ध हक्क आहे. तो हिरावून घेण्याचा प्रयत्न करणाऱ्यांना इतिहास कधीच माफ करणार नाही.”
याच कार्यक्रमात सोनझारी आदिवासी समाजाने सन्मानचिन्ह प्रदान करून उपस्थित मान्यवरांचा गौरव केला.
मूलनिवासी हक्कांची पुन्हा एकदा ठाम हाक
“बिरसा मुंडा फक्त इतिहासाचा अध्याय नाहीत; ते मूलनिवासी अस्मितेचे धगधगते प्रतीक आहेत. जमीन, जंगल आणि जल यावर पहिला हक्क आदिवासींचाच — हा सत्य लपविणाऱ्यांच्या विरोधातच बिरसा मुंडांनी बंड उभारले होते.”