अकोला,(प्रतिनिधी;शुभम गोळे);१४ नोव्हेंबर रोजी संत गाडगे बाबा अमरावती विद्यापीठावर होणाऱ्या मोर्चाच्या पार्श्वभूमीवर अखिल भारतीय विद्यार्थी परिषद (अ.भा.वि.प.) अकोला महानगराच्या वतीने आज महाविद्यालय बंद आंदोलन करण्यात आले. या आंदोलनाला जिल्ह्यातील सर्व महाविद्यालयांकडून उत्स्फूर्त असा प्रतिसाद मिळाला असून विद्यार्थी वर्गात प्रचंड जनसमर्थन दिसून आले.
अ.भा.वि.प. ने अमरावती विद्यापीठातील विविध विद्यार्थ्यांशी संबंधित प्रश्न, शैक्षणिक व्यवस्थेतील त्रुटी आणि विद्यार्थ्यांच्या हक्कांसाठी १४ नोव्हेंबर रोजी मोठा मोर्चा आयोजित केला आहे. या आंदोलनाला समर्थन म्हणून अकोल्यातील महाविद्यालयांमध्ये आज बंद पाळण्यात आले
या बंदमध्ये शंकरलाल खंडेलवाल कला, वाणिज्य आणि विज्ञान महाविद्यालय, श्री शिवाजी महाविद्यालय, आर.एल.टी. महाविद्यालय, आर.डी.जी. महाविद्यालय आदी प्रमुख महाविद्यालयांनी सहभाग घेतला. विद्यार्थ्यांनी महाविद्यालय प्रशासनाला निवेदन सादर करून आंदोलनास समर्थन दर्शविले.
अ.भा.वि.प. चे कार्यकर्ते सकाळपासून विविध महाविद्यालयांत जाऊन विद्यार्थ्यांना आंदोलनाचे महत्त्व पटवून देत होते. ठिकठिकाणी घोषणाबाजी, निदर्शने आणि निवेदन सादरीकरणाची प्रक्रिया पार पडली. या दरम्यान विद्यार्थ्यांचा उत्साह ओसंडून वाहताना दिसला.
अ.भा.वि.प. अकोला महानगरचे पदाधिकारी यांनी सांगितले की, “विद्यार्थ्यांच्या न्याय्य मागण्यांसाठी लढा सुरू असून अमरावती विद्यापीठ प्रशासनाने विद्यार्थ्यांचे प्रश्न गांभीर्याने घ्यावेत. अन्यथा आंदोलन अधिक तीव्र केले जाईल.”
या आंदोलनामुळे आज अकोल्यातील शिक्षणसंस्था शांत राहिल्या, पण विद्यार्थ्यांमध्ये आगामी १४ नोव्हेंबरच्या मोर्चाबद्दल मोठी तयारी आणि उत्सुकता दिसून येत आहे.