अकोला (प्रतिनिधी, प्रशिक मेश्राम);अकोला जिल्हा पोलीस अधिक्षक कार्यालयात लाचखोरीचा मोठा प्रकार उघडकीस आला असून, वरिष्ठ लिपिक श्रीमती ममता संजय पाटील यांना लाचलुचपत प्रतिबंधक विभाग, अमरावती यांनी रंगेहात पकडले आहे. या धक्कादायक घटनेनंतर पोलीस अधिक्षक, अकोला यांनी तत्काळ कारवाई करत ममता पाटील यांना निलंबित केले आहे.मिळालेल्या माहितीनुसार, तक्रारदार हे धान्य खरेदी–विक्रीचा व्यवसाय करतात. त्यांच्या कमिशन बेसवर काम करणाऱ्या कैलास ओमप्रकाश अग्रवाल या व्यक्तीने ऑक्टोबर २०२३ मध्ये तक्रारदाराच्या वेअरहाऊसमधील धान्य अनुमतीशिवाय विकून फसवणूक केली. या प्रकरणी रामदासपेठ पोलीस ठाण्यात गुन्हा दाखल करण्यात आला होता.सदर प्रकरणाच्या तपासात काही अधिकाऱ्यांनी आरोपीस मदत केली असल्याचा संशय निर्माण झाल्याने तक्रारदाराने पोलीस अधिक्षक, अकोला यांच्याकडे लेखी तक्रार दाखल केली होती. त्या तक्रारीच्या चौकशीसाठी मा. अपर पोलीस अधिक्षक, अकोला यांनी अहवाल सादर केला. या अहवालावर नोटशीट तयार करून वरिष्ठांना सादर करण्यासाठी वरिष्ठ लिपिक ममता पाटील यांनी २० हजार रुपयांची लाच मागितली होती.तडजोडीनंतर ८ हजार रुपयांवर सौदा ठरल्याने ०६ नोव्हेंबर २०२५ रोजी लाचलुचपत विभाग, अमरावती यांनी सापळा रचून ममता पाटील यांना रंगेहात पकडले.पोलीस अधिक्षक, अकोला यांनी या प्रकारावर कठोर भूमिका घेत “पोलीस खात्याची प्रतिमा मलिन करणाऱ्या कोणालाही सूट नाही” असा स्पष्ट संदेश देत, ममता पाटील यांना त्वरीत निलंबित करण्याचा आदेश जारी केला.दरम्यान, पोलीस अधिक्षक, अकोला यांच्या तर्फे जनतेला आवाहन करण्यात आले आहे की,
“पोलीस अधिक्षक कार्यालयात कोणत्याही कामासाठी कोणीही पैशाची मागणी करत असेल तर नागरिकांनी रोज सायं. ४.०० ते ६.०० या वेळेत थेट माझ्याशी संपर्क साधावा.”