वंचित बहुजन आघाडीचे मा.जिल्हा उपाध्यक्ष महेंद्र डोंगरे यांची ठाम भूमिका – “बहुजन नेत्यांच्या सन्मानावर कुणाचाही हल्ला सहन केला जाणार नाही”
अकोला (प्रतिनिधी – प्रशिक राजू मेश्राम) :बहुजन नेते ॲडव्होकेट प्रकाश यशवंत आंबेडकर आणि मा. सुजात आंबेडकर यांच्या विरोधात सोशल मीडियावर प्रसारित करण्यात आलेल्या आक्षेपार्ह, अवमानकारक आणि बदनामीकारक व्हिडिओंविरोधात वंचित बहुजन आघाडीचे मा.जिल्हा उपाध्यक्ष महेंद्र देविदास डोंगरे यांनी अमरावती पोलीस आयुक्त, अकोला पोलीस अधीक्षक आणि रामदासपेठ पोलीस ठाणे यांना लेखी तक्रार सादर केली आहे.
‘द पॉलिटिकल आर्किटेक्ट कंपनी’, ‘विदर्भाचं राजकारण’, ‘महाराष्ट्राचा विश्वास’, ‘देवाभाऊ’ आणि ‘वर्धा लाईव्ह’ या फेसबुक पेजवरून ‘एक्सपोज सिरीज’ या नावाने काही व्हिडिओ २९ ऑक्टोबर २०२५ रोजी सोशल मीडियावर प्रसारित करण्यात आले.
हे व्हिडिओ समाजात तेढ निर्माण करण्याच्या हेतूने प्रसिद्ध करण्यात आल्याचा आरोप करण्यात आला आहे.
श्री महेंद्र डोंगरे यांचे मनोगत :
“बहुजन समाजाचे नेते अॅड. प्रकाश आंबेडकर हे आमचे प्रेरणास्थान आहेत. त्यांच्या सन्मानावर कुणाचाही हल्ला आम्ही सहन करणार नाही.
सोशल मीडियावरून होत असलेली ही बदनामी केवळ नेत्यांवरील हल्ला नाही, तर आमच्या समाजाच्या अस्मितेवर आघात आहे.
अनुसूचित जाती-जमातीच्या भावना दुखावणारी कोणतीही कृती ही कायद्याने दंडनीय आहे. म्हणूनच आम्ही भारतीय न्याय संहिता, माहिती तंत्रज्ञान अधिनियम आणि ॲट्रॉसिटी ॲक्ट अंतर्गत तात्काळ गुन्हा दाखल करण्याची मागणी केली आहे.”
तक्रारीत भारतीय दंड संहिता कलम 299, 196, 357, माहिती तंत्रज्ञान अधिनियम, तसेच अनुसूचित जाती-जमाती (अत्याचार प्रतिबंधक) कायदा 1989 च्या कलम 3(1)(r)(s) आणि 3(1)(8) अंतर्गत कारवाईची मागणी करण्यात आली आहे.
सदर तक्रारीसोबत फेसबुकवरील व्हिडिओंचे स्क्रीनशॉट्स व यूआरएल लिंक पुराव्यादाखल जोडण्यात आले आहेत.
तक्रार दाखल करताना वंचित बहुजन आघाडीचे अनेक पदाधिकारी आणि कार्यकर्ते उपस्थित होते, त्यांनी या कृत्याचा निषेध नोंदवत आरोपींवर कठोर कारवाईची मागणी केली.
“बहुजन नेत्यांच्या विरोधात चालवली जाणारी खोट्या प्रचाराची मालिका थांबवली नाही, तर रस्त्यावर उतरून आंदोलन करण्यात येईल,” असा इशाराही पदाधिकाऱ्यांनी दिला.