अकोला: एमआयडीसी पोलीस स्टेशन अंतर्गत येणाऱ्या एका परिसरात दोन बांगलादेशी इसम अनधिकृत रित्या वास्तव्य करीत असल्याची माहिती मिळताच एटीएस आणि एमआयडीसी पोलीस यांनी संयुक्त कारवाई करीत त्यांच्या मुसक्या आवळल्या असून या प्रकरणी शुक्रवारी रात्री उशीरा गुन्हे दाखल करण्यात आल्याचे माहिती विश्वसनीय सूत्रांनी दिली आहे.
राज्यात बांगलादेशी इसम मोठ्या प्रमाणात अनधिकृत रित्या वास्तव्य करीत असून, त्यांच्यावर कारवाई करण्याचे ड्राईव्ह राबविण्याचे निर्देश नुकतेच राज्याचे मुख्यमंत्री तथा गृहमंत्री ना. देवेंद्र फडणवीस यांनी दिले. सदर निर्देशानुसार राज्यातील गुप्त यंत्रणा, जिल्हा एटीएस कामाला लागले असून त्यांनी कुंडली गोळा करण्यास सुरुवात केली. या मोहिमेत जिल्हा एटीएसला मोठे यश मिळाले असून शहरातील एमआयडीसी पोलीस स्टेशन अंतर्गत येणाऱ्या परिसरात दोन बांगला देशी इसम राहत असल्याची खात्री होताच जिल्हा एटीएस आणि एमआयडीसी पोलिसांनी संयुक्त कारवाई करीत दोन बांगलादेशी इसमांना ताब्यात घेतल्याची माहिती सूत्रांकडून मिळाली आहे. सदर प्रकरणी संपूर्ण पडताळणी केल्याअंती एमआयडीसी पोलीस ठाण्यात गुन्हा दाखल करण्यात आला. हे दोन्ही बांगलादेशी नागरीक बनावट कागदपत्रांच्या आधारे भारतात आले. दोघेही अकोल्यात बांधकाम मजूर म्हणून काम करीत असल्याची माहिती पोलिसांना प्राप्त झाली असून पुढील तपास सुरू आहे.
दरम्यान, सदर प्रकरणी केलेल्या कारवाईची मोठ्या प्रमाणात गुप्तता पाळण्यात आली होती. शहरात अजून काही ठिकाणी अनधिकृत रित्या वास्तव्यास असलेले बांगलादेशी इसम यंत्रणेच्या रडारवर असल्याची माहिती आहे.