“वारंवार तक्रारी करूनही स्वच्छतेची दखल नाही; शेवटी नागरिकांनीच हाती घेतले फावडे“
अकोला:-प्रतिनिधी(सुमेध कांबळे); अकोट फैल परिसरातील अशोक नगर आणि टायगर वाडी भागात सांडपाणी व कचऱ्याचा त्रास तीव्र झाला असून नागरिकांचा संताप उसळला आहे. नाले तुंबल्याने रस्त्यावर सांडपाणी साचले, दुर्गंधी आणि मच्छरांच्या उपद्रवामुळे नागरिकांचं जगणं त्रासदायक बनलं आहे.
महानगरपालिकेकडून स्वच्छतेच्या नावाखाली केवळ दिखाऊ कारवाई होत असल्याचा आरोप स्थानिक रहिवाशांनी केला आहे. अनेक तक्रारी दिल्यानंतरही अधिकारी दखल घेत नसल्याने नागरिकांनीच पुढाकार घेऊन नाले स्वच्छ करण्याचा निर्धार केला. काहींनी स्वतः फावडे, काठी, झाडू हातात घेऊन कचरा व सांडपाणी बाहेर काढलं.
“दरवर्षी हीच परिस्थिती, पावसात घरात पाणी, बाहेर चिखल. तरीही महापालिका काही करत नाही,” अशी खंत स्थानिक नागरिकांनी व्यक्त केली.
त्यांनी प्रशासनाला इशारा दिला आहे की, जर तातडीने सफाई मोहीम राबवली नाही, तर नागरिक रस्त्यावर उतरून आंदोलन करतील.