अकोला : अकोट फाईल परिसरात आज सकाळी पत्नीचा खून झाल्याची धक्कादायक घटना घडली. राजु नगर, अकोट फाईल येथील शेख शमीम शेख राजु (३६) हिचा तिचाच पती शेख राजु शेख निजाम (४१) याने चाकूने वार करून खून केल्याची माहिती पोलिसांनी दिली.
दाम्पत्यामध्ये फारकतीच्या कोर्टप्रकरणावरून वाद सुरू होता. दोघेही एकत्र राहात असतानाच शेख राजु हा पत्नीच्या चालीरीतींवर संशय घेत होता. त्यातून पती-पत्नीमध्ये वारंवार वाद आणि भांडणे होत असत. आज दि. २४ नोव्हेंबर रोजी सकाळी १०.३० च्या सुमारास झालेल्या वादाच्या दरम्यान शेख राजु याने घरातील धारदार चाकूने शेख शमीमच्या गळ्यावर वार केले. गंभीर जखमी अवस्थेत तिला उपचारासाठी सरकारी रुग्णालयात नेण्यात आले, मात्र उपचारादरम्यान तिचा मृत्यू झाला.
घटनेनंतर अकोट फाईल पोलिसांनी आरोपी शेख राजु यास तात्काळ ताब्यात घेतले असून त्याच्याविरुद्ध गुन्हा दाखल करण्याची प्रक्रिया सुरू आहे. घटनास्थळी फॉरेन्सिक टीम, डॉग स्कॉड तसेच पोलिसांचा ताफा दाखल झाला होता.
या कारवाईत पोलीस अधीक्षक श्री. अर्चित चांडक, अप्पर पोलिस अधीक्षक बदेली रेड्डी, उपविभागीय पोलिस अधिकारी सुदर्शन पाटील यांच्या मार्गदर्शनाखाली पोनि शेख रहीम, सपोनि जनार्धन खंडेराव, पो.उ.नि. शेख, डी.बी. पथक व अकोट फाईल पोलीस स्टेशनचा स्टाफ यांनी सहभाग घेतला. पुढील तपास अकोट फाईल पोलीस करीत आहेत.