वंचित बहुजन आघाडीच्या उमेदवारांमध्ये नवचैतन्य — पक्ष कार्यालयात इच्छुकांची गर्दी
अकोला(प्रतिनिधी, शुभम गोळे): अकोला जिल्ह्यातील विविध नगरपरिषद व नगरपंचायतींसाठी होणाऱ्या निवडणुकांकरिता वंचित बहुजन आघाडी पक्षाकडून नगराध्यक्ष व सदस्य पदांसाठी उमेदवारी अर्ज स्वीकारण्यास प्रारंभ झाला आहे. पक्षाध्यक्ष अॅड. बाळासाहेब आंबेडकर यांच्या आदेशानुसार ही प्रक्रिया औपचारिकपणे सुरू करण्यात आली आहे.
तेल्हारा, अकोट, मुर्तीजापूरसह अनेक नगरपरिषदांचा समावेश
तेल्हारा नगरपरिषद, मुर्तीजापुर नगरपरिषद, अकोट नगरपरिषद, बाळापुर नगरपरिषद, हिवरखेड नगरपरिषद, पातुर नगरपरिषद व बार्शीटाकळी नगरपंचायत या ठिकाणच्या निवडणुकीसाठी इच्छुक उमेदवारांना पक्ष कार्यालय, टॉवर चौक, अकोला येथे उमेदवारी अर्ज स्वीकारले जात आहेत.
अर्ज स्वीकारण्याची मुदत १३ ऑक्टोबर ते २० ऑक्टोबर २०२५ अशी असून दुपारी १ ते ४ या वेळेत अर्ज जमा करता येणार आहेत.
पक्ष कार्यालयात उत्साहाचे वातावरण
नगराध्यक्ष व सदस्य पदांसाठी आरक्षण जाहीर झाल्यानंतर इच्छुकांमध्ये नवचैतन्य दिसून आले आहे. आज अनेक कार्यकर्ते व संभाव्य उमेदवारांनी पक्ष कार्यालयात भेट देत अकोला जिल्हा महासचिव मिलिंद इंगळे यांच्याकडून उमेदवारी अर्ज स्वीकारले.
कार्यालयात उमेदवारांची गर्दी उसळली असून निवडणुकीत सक्रिय सहभागाची उत्सुकता स्पष्टपणे जाणवत आहे.