प्रतिनिधी / रोशन गोवर्धन इंगळे, अकोला:-“सेंद्रिय शेती ही केवळ परंपरेची नव्हे तर काळाची गरज आहे,” असा ठाम संदेश सुमिंतर इंडिया सेंद्रिय शेती अभियानांतर्गत झालेल्या सेंद्रिय कापूस उत्पादक शेतकरी मेळाव्यात मान्यवरांनी दिला. भारत सरकारच्या वाणिज्य मंत्रालयांतर्गत एग्रीकल्चर अँड प्रोस्सेस्ड फूड प्रॉडक्ट एक्सपोर्ट डेव्हलपमेंट ऑथॉरिटी (APEDA) च्या मार्गदर्शनाखाली दरवर्षीप्रमाणे या वर्षीही हा मेळावा भव्यदिव्य स्वरूपात मोठ्या उत्साहात पार पडला.
मेळाव्याचे आयोजन मोठी उमरी येथील शोभा मंगल कार्यालयात करण्यात आले. सुरुवातीला भारतरत्न डॉ. पंजाबराव देशमुख यांच्या प्रतिमेस पुष्पांजली अर्पण करून आणि दीपप्रज्वलनाने कार्यक्रमाचे उद्घाटन करण्यात आले.
या वेळी प्रमुख पाहुणे म्हणून किरवे, जिल्हा अधीक्षक कृषी अधिकारी अकोला, हरीश देशमुख, कृषी उपसंचालक अकोला, विवेक बिरहाडे, उपविभागीय कृषी अधिकारी अकोला, विलास वाशिमकर, तालुका कृषी अधिकारी अकोला, डॉ. चारुदत्त ठिपसे, विशेषज्ञ, कृषी विज्ञान केंद्र अकोला, तसेच डॉ. हरीयोगेंद्र शुक्ला, सहाय्यक महाव्यवस्थापक सुमिंतर इंडिया, मुंबई उपस्थित होते.
कार्यक्रमाचे प्रास्ताविक डॉ. हरीयोगेंद्र शुक्ला यांनी केले. त्यांनी सेंद्रिय शेतीचे महत्त्व, त्यातील अंमलबजावणीची आव्हाने, प्रमाणिकीकरण प्रक्रिया आणि सुमिंतर इंडियाच्या सेंद्रिय उपक्रमांविषयी सविस्तर माहिती दिली.
या मेळाव्यात ४० सेंद्रिय कापूस उत्पादक शेतकऱ्यांचा सन्मानचिन्ह देऊन गौरव करण्यात आला. प्रमुख पाहुणे हरीश देशमुख यांनी “सेंद्रिय शेती ही निसर्गाशी सुसंगत शेती आहे; भावी पिढ्यांसाठी माती, पाणी आणि पर्यावरणाचे रक्षण हेच शाश्वत शेतीचे उद्दिष्ट असावे,” असे मत व्यक्त केले.
तर विलास वाशिमकर यांनी कृषी विभागाच्या विविध योजना तसेच ‘महाविस्तार ए.आय. अॅप’विषयी सविस्तर माहिती दिली. शेवटी उपस्थित शेतकऱ्यांनी या मेळाव्यातून सेंद्रिय शेतीबाबत नवचैतन्य आणि प्रेरणा मिळाल्याची भावना व्यक्त केली.