मुर्तिजापूर(प्रतिनिधी ): स्थानिक स्वराज्य संस्थेच्या सार्वत्रिक निवडणूक २०२५ पार्श्वभूमीवर शहरात आदर्श आचारसंहिता काटेकोर रित्या लागू राहावी, तसेच मतदान प्रक्रिया शांततेत व पूर्णतः भयमुक्त वातावरणात व्हावी, यासाठी आज जिल्हाधिकारी श्रीमती वर्षा मीना आणि जिल्हा पोलीस अधीक्षक श्री. अर्चित चांडक यांनी संयुक्त दौरा करून तयारीचा आढावा घेतला.
मुर्तिजापूर नगर परिषद निवडणूक २ डिसेंबर रोजी होत असताना संवेदनशील भागांमध्ये प्रत्यक्ष पाहणी करून दोन्ही वरिष्ठ अधिकाऱ्यांनी आवश्यक त्या उपाययोजना तात्काळ राबविण्याच्या सूचना केल्या.
स्वीप अंतर्गत मतदार जनजागृतीला सुरुवात
अधिकाऱ्यांच्या आगमनानंतर शहरात सुरू असलेल्या स्वीप मोहिमेअंतर्गत १००% मतदानासाठी मोठ्या प्रमाणात जनजागृती करण्यात येत असल्याची माहिती देण्यात आली. यावेळी मा. जिल्हाधिकारी व पोलिस अधीक्षक यांच्या हस्ते मतदार जनजागृती स्वाक्षरी अभियानाचा शुभारंभ करण्यात आला.
मुर्तिजापूर हायस्कूल व सेंट आन्स स्कूलच्या विद्यार्थ्यांनी सादर केलेल्या मतदार जागृती पथनाट्याने वातावरण भारावले, तर नागरिकांमध्ये मतदानाबाबत उत्साह निर्माण झाला. शहरभर लावण्यात आलेले हँडी पोस्टर, बॅनर आणि जनजागृती मोहीम विशेष आकर्षण ठरली.
संविधान दिनाचे औचित्य साधून उद्देशिकेचे वाचन
२६ नोव्हेंबर संविधान दिनानिमित्त निवडणूक निर्णय अधिकारी संदीपकुमार अपार यांनी संविधान उद्देशिकेचे वाचन केले. त्यानंतर २६/११ मुंबई हल्ल्यात शहीद झालेल्या पोलीस अधिकाऱ्यांना व नागरिकांना मौन श्रद्धांजली अर्पण करण्यात आली.
आढावा बैठक : समाधान आणि सूचना
नगरपालिका सभागृहात झालेल्या बैठकीत जिल्हाधिकारी मॅडम आणि पोलीस अधीक्षकांनी क्षेत्रीय अधिकारी, नोडल अधिकारी यांच्याशी चर्चा करून निवडणूक तयारीत समाधान व्यक्त केले आणि काही आवश्यक सूचना दिल्या.
बैठकीस जिल्हा सह आयुक्त डॉ. विश्वनाथ वडजे, सहायक निवडणूक निर्णय अधिकारी निलेश जाधव, अतिरिक्त सहा. निवडणूक अधिकारी शिल्पा बोबडे, उपविभागीय पोलीस अधिकारी वैशाली मुळे, तसेच पोलिस निरीक्षक अजित जाधव उपस्थित होते.
स्ट्राँग रूम व मतदान केंद्रांची सखोल पाहणी
यानंतर जिल्हाधिकारी व पोलीस अधीक्षकांनी स्ट्राँग रूम, मतमोजणी कक्ष तसेच शहरातील निवडणूक केंद्रांचे प्रत्यक्ष निरीक्षण करून सुरक्षा व्यवस्थेची पाहणी केली. संपूर्ण तयारी समाधानकारक असल्याचे त्यांनी सांगितले.