अकोला,(प्रतिनिधी, प्रशिक मेश्राम) —दारूबंदी कायदा लागू असूनही काही असामाजिक प्रवृत्ती दारूची बेकायदेशीर विक्री करत आहेत. अशाच एका प्रकरणात खदान पोलीस स्टेशनच्या पथकाने गुप्त माहितीच्या आधारे कारवाई करत संघपाल दिपक खंडारे (वय ३७, रा. गौतम नगर, जुना आरटीओ रोड, अकोला) यास देशी दारू वाहतूक प्रकरणात अटक केली आहे.
पोलीस सूत्रांकडून मिळालेल्या माहितीनुसार, दि. २४ ऑक्टोबर रोजी रात्री ८.३० वाजता पो. हवालदार संतोश गावंडे, पो. अमरसिंग पवार, संदीप काटकर व भुशन मोरे हे पेट्रोलिंग करत असताना गुप्त बातमी मिळाली की, आरोपी संघपाल खंडारे हा अॅक्टीवा (क्रमांक एमएच ३० टी ९२७४) वरून देशी दारूची अवैध वाहतूक करीत आहे.
पोलिसांनी तत्काळ नाकाबंदी करून संशयितास पकडले. पंचासमक्ष तपासणी केल्यावर त्याच्याकडून संत्रा कंपनीची देशी दारू — प्रत्येकी १८० एमएल क्षमतेच्या २४ क्वॉर्टर बाटल्या, एकूण किंमत ₹१,९२०, तसेच अॅक्टीवा दुचाकी ₹५०,००० असा मिळून ₹५१,९२० किमतीचा मुद्देमाल जप्त करण्यात आला.
सदर आरोपीकडे दारू साठवणूक व वाहतूक करण्याचा कोणताही वैध परवाना नसल्याने त्याच्याविरुद्ध महाराष्ट्र दारूबंदी कायदा कलम ६५(ई) अंतर्गत गुन्हा नोंदविण्यात आला आहे. पुढील तपास खदान पोलीस करीत आहेत.
दारूबंदी कायद्याची अंमलबजावणी प्रभावीपणे व्हावी व समाजात अशा बेकायदेशीर धंद्यांना आळा बसावा, यासाठी नागरिकांनीही प्रशासनाला सहकार्य करावे, असे आवाहन सामाजिक कार्यकर्त्यांकडून करण्यात येत आहे.