दोन्ही जिल्ह्यातील फरार आरोपी अटक – दुचाकी चोर ४० हजाराच्या मुद्देमालासह जेरबंद
अकोला(प्रतिनिधी, प्रशिक मेश्राम): स्थानिक गुन्हे शाखा, अकोला यांनी मुंबई व जळगाव पोलिसांना केलेल्या तातडीच्या सहकार्यामुळे दोन गंभीर गुन्ह्यांतील फरार आरोपींना अटक करण्यात आली. त्याचवेळी शहरात दुचाकी चोरीच्या प्रकरणातील एक चोरटा पकडण्यात आला असून ४० हजार रुपयांचा मुद्देमाल हस्तगत करण्यात आला आहे.
मुंबई पोलिसांचा अकोला दौरा, फरार आरोपी पकडला
मुंबईतील काळा चौकी पोलिस ठाण्याच्या पथकाने अपराध क्र. ३८९/२०२५ (कलम ३१६, ३१८, ३(५) BNS) मधील फरार आरोपी सज्जाद गरीब शहा इराणी (वय ४५, रा. पुणे) याच्या शोधासाठी अकोला गाठले.
मुंबई पोलिसांचे वरिष्ठ निरीक्षक श्री. शिंदे यांनी अकोला स्थानिक गुन्हे शाखा प्रमुख श्री. शंकर शेळके यांच्याशी संपर्क साधून मदत मागितली. गुप्त माहितीच्या आधारे सज्जाद इराणी याला अकोल्यात अटक करून मुंबई पोलिसांच्या ताब्यात देण्यात आले.
जळगाव पोलिसांचाही समन्वय – दोन आरोपी जेरबंद
जळगाव स्थानिक गुन्हे शाखा अधिकारी श्री. गायकवाड यांनी अकोला LCB शी संपर्क साधून गुन्हा क्र. ३१६/२०२५ (कलम ३१०(२) BNS) मधील फरार आरोपी अकोल्यात असल्याची माहिती दिली. तातडीने कारवाई करत अकोला पोलिसांनी सिद्धांत सुनील हिरोळे (वय १९, रा. कौलखेड) व एका अल्पवयीन आरोपीला शोधून अटक केली. दोन्ही आरोपींना जळगाव पोलिसांच्या ताब्यात देण्यात आले.
दुचाकी चोर पकडला – ४० हजारांचा मुद्देमाल
दरम्यान, अकोला शहरातील शंकर नगर परिसरात चोरीच्या दुचाकीबाबत गुप्त माहिती मिळताच पोलिसांनी छापा टाकला. दीपक साहेबराव खडसे (वय ३३, रा. आपातापा रोड) हा चोरीस गेलेल्या होंडा शाईन मोटारसायकलसह सापडला.
चौकशीत त्याने १९ सप्टेंबर २०२५ रोजी जिल्हा मध्यवर्ती बँक परिसरातून दुचाकी चोरीची कबुली दिली. मोटारसायकल (MH 30 BX 2519) किंमत सुमारे ४०,००० रुपये जप्त करण्यात आली असून आरोपीला सिटी कोतवाली पोलिसांच्या ताब्यात देण्यात आले.
वरिष्ठ अधिकाऱ्यांचे मार्गदर्शन
ही संपूर्ण कारवाई मा. पोलीस अधीक्षक श्री. अर्चीत चांडक, अपर पोलीस अधीक्षक श्री. बी. चंद्रकांत रेड्डी व पोलीस निरीक्षक श्री. शंकर शेळके यांच्या मार्गदर्शनाखाली करण्यात आली. पीएसआय बोडके, पो.हवा. शेख हसन, पो.शि. वसीमदिन, एजाज अहमद, महेंद्र मलिये, किशोर सोनवणे, स्वप्रिल खेडकर व अशोक सोनवणे यांनी महत्त्वाची भूमिका बजावली.