अप्पर जिल्हाधिकारी ख्यातनाम उर्दू गझलकारा मोनिका सिंग यांच्या हस्ते प्रकाशित…
अकोला (दि ९ ॲाक्टोबर २०२२):
मराठी रसिकांना मराठी गझलने चांगलेच वेड लावले आहे.मराठी गझलच्या कला आणि कौशल्यासंबंधी सबकुछ देणाऱ्या, ख्यातनाम गझलकार श्रीकृष्ण राऊत यांच्या ‘गझलकार ‘ या मराठी गझलच्या ब्लॉगचा ‘गझलकार सीमोल्लंघन ‘हा वार्षिकांक दरवर्षी दसऱ्याच्या निमित्ताने मागील चौदा वर्षांपासून ऑनलाईन प्रकाशित होत असतो.
यावर्षी सुद्धा ‘गझलकार सीमोल्लंघन २०२२ ‘हा ऑनलाईन अंक ख्यातनाम उर्दू गझलकारा मोनिका सिंग अपर जिल्हाधिकारी आणि विश्वस्त सुरेश भट गझलमंच यांचे हस्ते नुकताच प्रकाशित झाला.सुरेशकुमार वैराळकर, श्रीकृष्ण राऊत आणि अमोल शिरसाट यांनी हा अंक संपादित केला आहे.
यंदा ह्या अंकात महाराष्ट्रभरातील १३५ मराठी गझलकारांच्या जवळपास चारशे गझला तसेच मराठी गझल संदर्भातील महत्वाचे चौदा लेख समाविष्ट आहेत. दसऱ्याच्या मुहूर्तावर ऑनलाइन प्रकाशित झालेल्या अंकाची चोवीस तासात गुगल स्टॅटसनुसार ही बातमी लिहेपर्यंत जगभरातल्या गझल रसिकांनी सतरा हजाराहून अधिक पृष्ठे वाचली. त्यात भारत, यू एस ए, आयर्लन्ड, सिंगापूर, नेदरलॅंड,स्वीडन, ऑस्ट्रेलिया, यू के, यु ए इ, कॅनडा, इंडोनेशिया, जर्मनी व इतर देशातील गझल रसिकांचा समावेश आहे.