अकोला,(प्रतिनिधी, प्रशिक मेश्राम);अवैध कत्तलखान्यांवर पोलिसांची धरपकड सुरू असताना, अकोल्यात “ऑपरेशन प्रहार” अंतर्गत रामदासपेठ पोलिसांनी पहाटेच धाड टाकत १८ गोवंश जनावरांची सुटका करून त्यांना जीवदान दिले. या कारवाईत पोलिसांनी ४ लाख ८ हजारांचा मुद्देमाल जप्त केला असून तिघा आरोपींवर गुन्हा नोंदविण्यात आला आहे.
मिळालेल्या गुप्त माहितीनुसार, ताजनापेठ परिसरातील मच्छीमार्केटसमोर कुरेशी कार्यालयाजवळ काही व्यक्ती गोवंश जनावरांना कत्तलीसाठी अमानुषपणे बांधून ठेवत असल्याची माहिती पोलिसांना मिळाली. तत्काळ पोलीस निरीक्षक शिरीष खंडारे यांच्या मार्गदर्शनाखाली पथकाने घटनास्थळी धडक दिली असता १८ लहान-मोठी जनावरे निर्दयतेने बांधून ठेवलेली आढळली.
पोलिसांनी घटनास्थळावरून शेख मोबीन कुरेशी, मोहम्मद अर्शद कुरेशी आणि शेख जाफर (रा. अकोट फाईल) या तिघांविरुद्ध कलम ५(अ), ५(ब), ९ महाराष्ट्र प्राणी संरक्षण कायदा तसेच कलम ११ प्राण्यांचा छळ प्रतिबंध अधिनियम अंतर्गत गुन्हा नोंदविला आहे.
या कारवाईत पो.हे.कॉ. सुरेश लांडे, संदिप वानखडे, किरण गवई, पो.अं. अनिल धनबर, रोशन पटले, अभिजीत इंगळे, म.पो.अं. कांचन उईके तसेच RCP क-०३ पथकातील अमलदारांनी सहभाग घेतला.
रामदासपेठ पोलिसांच्या तत्परतेमुळे १८ निरपराध जनावरांचे प्राण वाचले, तर अवैध कत्तल व्यवसायावर पुन्हा एकदा पोलिसांनी कठोर कारवाईचा बडगा उगारला आहे.
ही कारवाई पोलीस अधीक्षक अर्चित चांडक, अप्पर पोलीस अधीक्षक चंद्रकांत रेड्डी आणि उपविभागीय पोलीस अधिकारी (शहर विभाग) अकोला यांच्या मार्गदर्शनाखाली करण्यात आली.
👉 “ऑपरेशन प्रहार” अंतर्गत ही कारवाई अकोल्यात कायदा व सुव्यवस्था राखण्यासाठी पोलिसांची वचनबद्धता दाखवते.