अकोला (प्रतिनिधी, सुमेध कांबळे);सुमारे वीस वर्षांच्या सखोल अभ्यासानंतर डॉ. बाबासाहेब आंबेडकरांनी १४ ऑक्टोबर १९५६ रोजी नागपूरच्या ऐतिहासिक दीक्षाभूमीवर बौद्ध धर्माची दीक्षा घेतली. त्यांच्यासोबत लाखो अनुयायांनीही बौद्ध धर्म स्वीकारला. आधुनिक, तर्कसंगत व मानवी मूल्यांवर आधारित धर्म म्हणून बाबासाहेबांनी बौद्ध धर्माची निवड केली होती. त्यांनी ‘बुद्ध आणि त्याचा धम्म’ हा ग्रंथ लिहिला,या ऐतिहासिक घटनेच्या स्मरणार्थ दरवर्षी १४ ऑक्टोबर रोजी ‘धम्मचक्र प्रवर्तन दिन’ साजरा केला जातो.
या पार्श्वभूमीवर रमाई महिला मंडळ यांच्या वतीने रमाई बौद्ध विहार, पिंपळ फैल, अकोट फैल, अकोला येथे ‘धम्मचक्र प्रवर्तन दिन’ उत्साहात साजरा करण्यात आला. कार्यक्रमात ‘बुद्ध आणि त्याचा धम्म’ या ग्रंथ पठणाचा समारोप सोहळा घेण्यात आला. यानिमित्ताने भव्य भोजनदानाचे आयोजन करून सामाजिक बंधुतेचा संदेश देण्यात आला.
कार्यक्रमाला परिसरातील बहुजन समाजाचा उत्स्फूर्त प्रतिसाद लाभला. या प्रसंगी कार्यक्रमाच्या यशस्वी आयोजनात विशेष योगदान दिलेल्या मान्यवरांचा सत्कार रमाई महिला मंडळाच्या वतीने करण्यात आला. संपूर्ण वातावरण बुद्धमय व प्रेरणादायी बनले होते.