अकोला : शंकरलाल खंडेलवाल महाविद्यालय, अकोला आणि क्विक हील फाऊंडेशन यांच्या संयुक्त विद्यमाने “सायबर शिक्षण फॉर सायबर सुरक्षा” या मोहिमेअंतर्गत जिजाऊ कन्या विद्यालयात सायबर सुरक्षा जनजागृती कार्यशाळेचे आयोजन करण्यात आले.
या कार्यशाळेत विद्यार्थ्यांना इंटरनेटचा सुरक्षित वापर, सोशल मीडियावरील गोपनीयता, ऑनलाइन फसवणूक टाळण्यासाठीचे उपाय तसेच डिजिटल जबाबदारी या महत्त्वाच्या मुद्द्यांवर मार्गदर्शन करण्यात आले. विविध सायबर गुन्ह्यांची उदाहरणे देत त्यापासून बचावाचे मार्ग विद्यार्थ्यांना समजावून सांगण्यात आले.
कार्यक्रमाचे मार्गदर्शन साक्षी दिनेश शिरसाट आणि प्रणाली विजय दवने यांनी केले. या उपक्रमाला शंकरलाल खंडेलवाल महाविद्यालयाचे प्राचार्य डॉ. जे. एम. साबू सर व समन्वयक डॉ. दीप्ती पेटकर मॅडम यांचा मोलाचा सहयोग लाभला.
शाळेच्या मुख्याध्यापिका सौ. मेधा देशपांडे मॅडम यांनी “अशा उपक्रमांमुळे विद्यार्थ्यांमध्ये जबाबदार डिजिटल सवयी रुजतात,” असे प्रतिपादन केले.
या कार्यशाळेला शाळेतील सर्व शिक्षक, शिक्षकेतर कर्मचारी आणि विद्यार्थ्यांची मोठ्या संख्येने उपस्थिती लाभली. विद्यार्थ्यांनी सायबर सुरक्षा विषयक मार्गदर्शन आत्मसात करत डिजिटल सुरक्षिततेविषयी जागरूकतेचा संदेश अंगीकारला.