धामणा (ता.अकोला, प्रतिनिधी,शुभम गोळे):ओला दुष्काळ, अपुऱ्या मदतीमुळे आर्थिक विवंचनेत सापडलेल्या धामणा येथील एका शेतकऱ्याने आत्महत्या केल्याची घटना समोर आली आहे. अरविंद विठ्ठल भांबेरे (वय ३५) असे मृत शेतकऱ्याचे नाव असून ते अकोला तालुक्यातील धामणा (पो. खांबोरा) येथील रहिवासी होते.
मिळालेल्या माहितीनुसार, अरविंद भांबेरे हे कष्टकरी शेतकरी असून ओल्या दुष्काळामुळे त्यांच्या शेतातील पिकांचे मोठे नुकसान झाले होते. पंचनामे झाले तरीही त्यांना अद्याप कोणतीही आर्थिक मदत मिळाली नव्हती. वाढत्या कर्जबाजारीपणामुळे आणि आगामी दिवाळी कशी साजरी करायची या चिंतेत ते मानसिक तणावाखाली होते.
दिनांक २३ ऑक्टोबर २०२५ रोजी सायंकाळी ते शेतातून घरी परतताना त्यांनी विषारी पदार्थाचे सेवन केले असावे, असा प्राथमिक अंदाज आहे. घरच्यांच्या लक्षात येताच त्यांनी तात्काळ त्यांना ग्रामीण रुग्णालयात नेले, मात्र उपचारापूर्वीच रस्त्यात त्यांचा मृत्यू झाला.
या घटनेमुळे परिसरात हळहळ व्यक्त केली जात आहे. गावकऱ्यांनी प्रशासनाकडे शेतकरी कुटुंबास तात्काळ आर्थिक मदत देण्याची मागणी केली आहे.
दरम्यान, पोलिसांनी आकस्मिक मृत्यूची नोंद केली असून पुढील तपास सुरू आहे.
प्रश्न उपस्थित:
“अजून किती निष्पाप शेतकऱ्यांचे प्राण जाऊन सरकार जागे होणार?” — असा संतप्त सवाल स्थानिक नागरिकांकडून उपस्थित केला जात आहे.