अकोला, प्रतिनिधी : डिजिटल युगात वाढत्या ऑनलाइन फसवणुकीच्या घटनांच्या पार्श्वभूमीवर खंडेलवाल महाविद्यालयात सायबर सुरक्षा जनजागृती कार्यशाळेचे आयोजन करण्यात आले. या कार्यशाळेत विद्यार्थ्यांच्या प्रश्नांना उत्तरे देत मोबाईलचा जबाबदारीने वापर करण्याची शपथ देण्यात आली.
ही कार्यशाळा शंकरलाल खंडेलवाल महाविद्यालय, अकोला यांचे प्राचार्य डॉ. जे. एम. साबू व समन्वयक डॉ. दीप्ती पेटकर यांच्या मार्गदर्शनाखाली पार पडली. शाळेच्या मुख्याध्यापिका चव्हाण मॅडम यांनी अशा उपक्रमांमुळे विद्यार्थ्यांमध्ये जबाबदार डिजिटल सवयी रुजतात, असे सांगितले.
सायबर सुरक्षेबाबत जागरुकता निर्माण करण्यासाठी खंडेलवाल महाविद्यालयाच्या सायबर वॉरियर्स कु. अदिती जनोरकर व तनुजा घोगरे यांनी विद्यार्थ्यांना मार्गदर्शन केले. त्यांनी डिजिटल फसवणुकीच्या पद्धती समजावून सांगितल्या तसेच ऑनलाइन सुरक्षित राहण्यासाठी काही महत्त्वाचे मुद्दे स्पष्ट केले.
सोशल मीडियाचा योग्य व जबाबदारीने वापर
वैयक्तिक माहितीचे संरक्षण
फसवे संदेश व लिंक्स ओळखण्याची पद्धत
मोबाईलचा सुरक्षित वापर व आवश्यक सुरक्षा अॅप्स
फसवणूक आढळल्यास सायबर सेलशी संपर्क
अदिती जनोरकर आणि तनुजा घोगरे यांनी विद्यार्थ्यांना ऑनलाइन जगात सतर्क राहण्याचे आवाहन केले. विद्यार्थ्यांनीही या शपथेच्या माध्यमातून सुरक्षित डिजिटल नागरिक होण्याचा संकल्प केला.
या कार्यक्रमामुळे विद्यार्थ्यांमध्ये डिजिटल जगातील धोक्यांविषयी जागरुकता वाढली असून जबाबदार इंटरनेट वापराची भावना दृढ झाली.