अकोला, (प्रतिनिधी प्रशिक मेश्राम):-आगामी स्थानिक स्वराज्य संस्था निवडणुका पारदर्शक, निष्पक्ष व शांततेत पार पाडण्यासाठी अकोला पोलीस दल पूर्णपणे सज्ज असल्याची माहिती आज झालेल्या मासिक गुन्हे आढावा परिषदेत देण्यात आली. ही बैठक पोलीस अधीक्षक श्री. अर्चित चांडक यांच्या मार्गदर्शनाखाली विजय हॉल, अकोला येथे संपन्न झाली.
बैठकीला सर्व उपविभागीय पोलीस अधिकारी, पोलीस स्टेशन प्रभारी अधिकारी तसेच शाखा प्रमुख उपस्थित होते.
🛡️ आचारसंहिता लागू – पोलिसांची कडक तयारी सुरू
महाराष्ट्र राज्य निवडणूक आयोगाने स्थानिक स्वराज्य संस्था सार्वत्रिक निवडणुका २०२५ जाहीर केल्यानंतर, ४ नोव्हेंबरपासून आदर्श आचारसंहिता लागू झाली आहे. या पार्श्वभूमीवर कायदा व सुव्यवस्था अबाधित ठेवण्यासाठी पोलिसांकडून विविध प्रतिबंधात्मक उपाययोजना राबविण्यात येत आहेत.
🚨 प्रमुख उपाययोजना
1️⃣ सराईत गुन्हेगारांवर कडक नजर:
गुंड प्रवृत्तीचे, फरार, पाहिजे आरोपी आणि जामीनावर सुटलेल्यांवर विशेष लक्ष ठेवून प्रतिबंधात्मक कारवाई सुरू आहे.
2️⃣ अवैध दारू व शस्त्रांवर धडक मोहीम:
दारू व शस्त्रसाठ्यांवर छापे; आचारसंहिता काळात परवानाधारकांनी शस्त्रे पोलिस ठाण्यात जमा करणे बंधनकारक.
3️⃣ मतदारांवर प्रभाव टाळण्यासाठी विशेष पथके:
रोख रक्कम, मद्य किंवा वस्तूंचे वाटप करणाऱ्यांवर गुन्हे दाखल. बँका व पतसंस्थांमार्फत संशयास्पद आर्थिक व्यवहारांवर लक्ष.
4️⃣ भरारी व स्थिर पथके कार्यरत:
वाहन तपासणी, संशयास्पद हालचालींवर नजर, सभा-मिरवणुकांचे व्हिडिओ सर्व्हेलन्स सुरू.
5️⃣ सोशल मीडियावर पोलिसांची करडी नजर:
आचारसंहिता भंग, अफवा, पेड न्यूज, द्वेषजनक पोस्ट्स यांवर तात्काळ कारवाई. परवानगीशिवाय बॅनर, पोस्टर लावल्यास गुन्हे दाखल होणार.
📢 नागरिकांना पोलिसांचे आवाहन
“मतदान भयमुक्त, प्रलोभनमुक्त वातावरणात करा. कोणताही बेकायदेशीर प्रकार, लाच, मद्यवाटप, दबाव किंवा धमकी आढळल्यास त्वरित पोलिसांना कळवा,” असे आवाहन अकोला पोलिसांनी केले आहे.
तक्रारींसाठी नागरिकांनी पोलीस नियंत्रण कक्ष (Dial 112) किंवा जिल्हास्तरीय तक्रार निवारण कक्षाशी संपर्क साधावा. माहिती देणाऱ्याचे नाव गुप्त ठेवण्यात येईल, अशी खात्री देण्यात आली आहे.
🗣️ पोलीस अधीक्षक अर्चित चांडक म्हणाले:
“अकोला पोलीस दल हे निष्पक्ष, पारदर्शक व निर्भय निवडणुकीसाठी सज्ज आहे. आचारसंहितेचे उल्लंघन करणाऱ्यांवर कठोर कारवाई होईल.”