अकोला (प्रतिनिधी, प्रशिक मेश्राम)– एमआयडीसी पोलीस ठाण्याच्या हद्दीत गोवंश जातीचे मांस बेकायदेशीररित्या वाहतूक करणाऱ्या एका इसमास पोलिसांनी रंगेहात पकडत गुन्हा दाखल केला आहे. या कारवाईत पोलिसांनी तब्बल ₹२ लाख २७ हजार रुपयांचा मुद्देमाल जप्त केला आहे.
दिनांक २५ ऑक्टोबर २०२५ रोजी रात्री सुमारास २०.०० वाजता फिर्यादी पोलीस हेडकॉन्स्टेबल सतीश प्रधान (ब.नं. १८५६) हे शासकीय वाहनाने पेट्रोलिंग करत असताना गुप्त माहिती मिळाली की, एक इसम चारचाकी वाहनाने गोवंश जातीचे मांस बाळगून बाभुळगाव येथे जात आहे. ही माहिती वरिष्ठांना देऊन पोलिसांनी बाभुळगाव रोडवरील उडाणपुलाजवळ सापळा रचला.
थोड्याच वेळात पांढऱ्या रंगाचे मॅक्झिमो वाहन (MH 30 AF 6884) संशयास्पदरीत्या दिसताच थांबवून तपासणी केली असता, गाडीच्या सीट मागे एका प्लास्टिकच्या पोत्यात सुमारे ५० किलो गोवंश जातीचे मांस सापडले. वाहनचालकास नाव विचारले असता त्याने स्वतःचे नाव अकबर खान रहमान खान (वय ३८, रा. हाजी नगर, बोरगाव मंजू) असे सांगितले.
त्याच्याकडून चौकशी केली असता सदर मांस आसिफ कुरेशी, रा. बोरगाव मंजू याच्याकडून आणल्याचे त्याने कबूल केले. पोलिसांनी ५० किलो मांस (किंमत ₹१२,०००), वाहन (किंमत ₹२ लाख) आणि मोबाईल फोन (किंमत ₹१५,०००) असा एकूण ₹२,२७,००० रुपयांचा मुद्देमाल जप्त केला.
या प्रकरणात गुन्हा क्रमांक ३०२/२०२५, कलम ५(क), ९(अ) महाराष्ट्र प्राणी संरक्षण अधिनियम १९७६ अंतर्गत गुन्हा नोंद करण्यात आला असून, आरोपीस अटक करण्यात आली आहे.
सदरची कारवाई पोलीस अधीक्षक अर्चित चांडक, अपर पोलीस अधीक्षक बि. चंद्रकांत रेड्डी, व उपविभागीय पोलीस अधिकारी सुदर्शन पाटील यांच्या मार्गदर्शनाखाली सहाय्यक पोलीस निरीक्षक राहुल जंजाळ, पो. उपनि. फुलउंबकर, पो. हे.कॉ. सतीश प्रधान, पो. हे.कॉ. अनिल दांदळे, व पो. कॉ. भगवान आकमार यांनी केली.